xoves 26 maio 2016

CAMPAMENTO DE VERAN 2016



  O CV Zalaeta está a organizar un Campamento de Verán aberto a todos os nenos e nenas de idades comprendidas entre os 8 e 14 anos.
  O Campamento realizarase entre os días 11 e 22 de Xullo, ambos inclusive, e realizásense dous grupos por idades, os nados nos anos 2005 e 2008, para os que haberá 25 prazas e os nados entre os anos 2002 e 2004 que dispoñerán de 20 prazas.
  O punto de encontro e centro de actividades será o Pavillón do Instituto de Zalaeta en horario de 10:00 a 14:00. Preténdese que sexa un campamento divertido no que prime a diversión e no que se poidan forxar amizades para toda a vida co Voleibol como base para todos os niveis, tanto de iniciación ou perfeccionamento.
  Trátase dun campamento co deporte como fundamento e nexo, pero pretendemos que sexa movido e divertido, e para iso concibimos unha actividade variada, polideportiva, de modo que tamén poderemos coñecer outros deportes e actividades relacionadas co aire libre e a actividade física.
Xogaremos e aprenderemos os fundamentos do Voleibol Pista e tamén do Voleibol Praia da man de adestradores e monitores do CV Zalaeta, así mesmo coñeceremos de preto e practicaremos a Esgrima da man dos monitores do Club Centolos de Esgrima da Coruña e tamén aprenderemos o que é a Esgrima Histórica, si, a das películas, tamén cos Centolos, e como non, aprenderemos a camiñar, sobre todo sen perdernos sabendo por onde andamos en todo momento, practicando Orientación e Rastrexo.
  Tampouco faltará unha actividade cultural como unha visita ao Museo da Ciencia e a Tecnoloxía da Coruña.
  O prazo de inscrición xa está aberto, as prazas son limitadas. Podes inscribirche no Pavillón do Instituto os luns, mércores e venres de 17:00 a 18:30 onde poderás cumprimentar a folla de inscrición, e lembra que deberá de realizar o ingreso da cota correspondente no seguinte nº de conta de La Caixa:  ES23-2100-4610-2022-0004-9850.
  Máis información no teléfono do club 647 79 56 99 e tamén neste blogue.


Podes descargar os impresos:  premendo aquí  irás a unha carpeta e en DESCARGAR podes DECARGAR FOTO.







venres 13 maio 2016

PARTIDOS DO FIN DE SEMANA

 
 
   Este fin de semana xogaranse os partidos de volta da Fase Final de Promoción de Ascenso a 1ª infantil e cadete, no que os equipos do club implicados xogan ambos en casa:

CV ZALAETA  Vs  VOLEYOURENSE   VENRES  13  19:15  PAVILLÓN INSTITUTO ZALAETA

CALASANCIAS CORUÑA  
Vs  CV ZALAETA   SÁBADO 10:00  PAVILLÓN COLEXIO CALASANCIAS 
 
 
 
 
 
 

luns 09 maio 2016

RESULTADOS DO FIN DE SEMANA




  Os resultados dos partidos do fin de semana foron os seguintes:
  O CV Zalaeta de infantís crúzase na fase final co VoleyOurense, co que xogou a primeira volta no Paco Paz o pasado sábado, nun partido que se saldou cun resultado favorable ás coruñesas de 1-3 con parciais 16-25; 14-25; 25-21 e 21-25.
  Bo partido das xogadoras de Cristina que agora xogaran o segundo partido na casa o próximo fin de semana, coa importante vantaxe da vitoria en Ourense para poder manter a categoría.
  Coa adestradora Cristina desprazáronse Claudia, Icia A., Sara, Lida, Paula, Alba, Alma, Iria, Icia D. e Andrea.  


 O equipo CV Zalaeta cadete medíase co Calasancias Coruña na Fase de Ascenso correspondente a 1ª Div, pero a sorte non foi favorable para o conxunto do Instituto, que neste primeiro enfrontamento cedeu un 0-3 con parciais 15-25; 16-25 e 14-25.
O partido de volta será na cancha de Calasancias, polo que a remontada será complicada para poder loitar polo ascenso de categoría.



venres 06 maio 2016

PARTIDOS FASE DE PROMOCIÓN E ASCENSO




  Continúan os partidos correspondentes aos cruces de promoción. En Cadetes e Infantís, que son os que afectan o club, serán os seguintes para o fin de semana:
  En categoría infantil CV Zalaeta, equipo que dirixe Cristina G. Bermejo, enfrontarase ao VoleyOurense na Fase Final de Promoción e Ascenso a 1ª, en partido de ida mañá sábado no Paco Paz de Ourense a partir das 10 da mañá.


  Tamén en Fase Final de Promoción de Ascenso a 1ª División, as cadetes afrontarán un espectacular duelo local: CV Zalaeta Vs Calasancias Coruña, nun primeiro partido na cancha do Instituto o domingo ás 11:30.

  
  Outros partidos: CV Zalaeta Infantil B xogarán contra CV Naron Volea no polideportivo Monte Dás Moas o sábado ás 10:30.
  O equipo de CV Zalaeta Alevíns xogará o sábado contra Eiris ás 10:00 e ás 11:45 contra CV Naron Volea no Monte Dás Moas.



luns 02 maio 2016

FINALIZA O CEXF 2016 DE ALCOBENDAS


  O sábado continuamos xogando no mesmo escenario, no excelente complexo deportivo Municipal José Caballero de Alcobendas, no Pavillón Amaya Valdemoro.

   Despois da decepción do día anterior no que o triplo empate déixanos en terceira posición por diferenza de puntos, pasamos a loitar polos postos 21 ao 24 e en primeiro lugar cruzámonos co Xátiva Voleibol a partir das 13:00.
  Bo comezo de partido para as do CV Zaleta que se impoñen claramente no primeiro set, parecía que se encarrilaba o encontro desde o principio, pero de maneira inexplicable, o equipo  vénse abaixo cando o Xátiva reacciona no segundo set e adiántase no marcador, cobrando cada vez unha maior diferenza que resulta imposible remontar, cédese este set e tamén o seguinte para tratar de recuperar no cuarto, no que a melloría do xogo coruñés foi finalmente un espellismo e perde o partido cun resultado de 1-3 con parciais: 25-21; 15-25; 12-25 e 20-25.
  Finalizamos a competición esta tarde, enfrontámonos de novo ao Salesianos Guadalaxara ás 20:00. Equipo coñecido, xa lle gañabamos na primeira rolda e co pechamos a competición nun partido longo no que ao Zalaeta cústalle atoparse na cancha.

  Dous bos primeiros sets, o primeiro axustado, pero no segundo as do Instituto cobran unha diferenza substancial, fan pensar nunha rápida vitoria, pero non é así. As de Guadalaxara plántanse, queren xogar o partido, e as coruñesas afúndense, de novo aparece a cara escura do campionato e ceden dous sets seguidos cunha diferenza importante. Prodúcese o empate e imos ao quinto, as de Salesianos divírtense na pista, xogan as súas bazas, pero o CV Zalaeta quere despedirse cunha vitoria aínda que sexa no último momento e espertan para xogar o tie break no que comezan cun parcial de 5-0, 8-3 ao cambio de campo.   Non hai cor, o Zalaeta fai o seu xogo, o do comezo do partido, domina o marcador e finaliza gañando o set e o partido por 3-0 con parciais 25-23; 25-11; 15-; 14-25 e 15-7, deste xeito despedímonos do campionato cunha vitoria.


  Un campionato que finaliza o domingo cando se xogan as finais, que enfrontan ás 10:00, polo terceiro e cuarto posto ao IBSA CV CCO7 Las Palmas co SANCHO REEBOK VOLEY JUN de Granada que finaliza cun resultado de 0-3 favorable ás andaluzas con parciais 11-25; 19-25 e 22-25.
  Ás 12:00 comezaba a gran final, un clásico nestes campionatos, entre o equipo organizador PROFESSIONAL ANSWER ALCOBENDAS e o CVB BARÇA


  Gran partido o que presenciamos no Antela Parada de Alcobendas, como corresponde unha final, moi igualado a pesar do que diga o resultado, no que as catalás se impuxeron cun partido moi completo no que foron superiores ao rival en bloqueo e en xogo na rede apoiadas nunha gran defensa, o que lles valeu o título cun resultado de 0-3 con parciais de 22-25; 23-25 e 20-25.

PARA VER FOTOS DE JULIO VÁZQUEZ: VARIAS    CONTRA UCAM     TORRELAVEGA  
 XATIVA E GUADALAXARA


sábado 30 abril 2016

CAMPIONATO DE ESPAÑA XUVENIL, 2ª FASE



  Finalizada a primeira fase na que o CV Zaleta enfrontouse no seu último partido co Nou Gran Sol Manacor pasamos á seguinte fase encadrados no segundo grupo para xogar os postos do 13 ao 24.
  O partido ante as manacorís resultou clave, neste enfrontamento o equipo perdedor pasaba a ocupar a terceira praza do grupo A e por tanto quedaba sen opción de clasificarse entre os mellores. Xa neste encontro causa baixa  para o resto do campionato a oposta Paula Castro.
  E non foi posible, os nervios e unha mala mañá non permitiron ás do Instituto realizar un bo partido e foron batidas polas rivais que se adxudicaron a segunda praza cun resultado de 3-0 con parciais 25-19; 25-17 e 25-13, nun partido no que as coruñesas foron de máis a menos e con iso tamén se foi a ilusión da segunda praza de grupo.

 

  A partir de aquí quedamos encadrados no grupo 5 da segunda fase con UCAM Murcia e CV Torrelavega, grupo complicado e no que ao final se produce un triplo empate que a de resolverse por diferenza de puntos, no que os resultados de cada parcial son clave.
  O primeiro partido xógase o venres ás 12:00 ante o UCAM, que vén de perder o seu encontro co Torrelavega por 3-1 o día anterior, e está decidido a non regalar nada.
  Partido moi disputado no Amaya Valdemoro que comeza co set claramente a favor das coruñesas, o que facía concibir ilusión, pero no segundo as murcianas danlle a volta ao marcador e poñen o 1-1. Gran igualdade no terceiro que se resolve máis aló do límite tamén a favor do UCAM e no cuarto o Zalaeta non é capaz de remontar e cede o partido cun resultado de 1-3 con parciais 25-16; 10-25; 25-27 e 16-25.
  Quedaba o partido da tarde ante as cántabras, para xogarse o todo polo todo, así son os campionatos, nada que ver coa competición regular, un mal momento pode xogarche unha mala pasada e relegarche na clasificación.
  Ás 20:00 comezaba o partido no mesmo escenario que o da mañá, os dous equipos decididos, o Torrelavega xogábase a cabeza do grupo, e Zalaeta o ser ou non ser.
  Disputan un encontro de infarto, peléxanse todos os puntos, non se regala nada, poucos erros e ademais os mesmos por cada equipo. Primeiro set para Zalaeta, segundo, empatan as cántabras, terceiro remontan as do Instituto para gañar o partido no cuarto, o máis longo e disputado. Vitoria coruñesa por 1-3 con parciais 24-26; 25-22; 22-25 e 27-29, 98-102 no cómputo total.

   Prodúcese deste xeito un triplo empate, un partido gañado cada equipo, 4 sets a favor e 4 en contra. Deciden a diferenza de puntos, e esta situación non favorece ao Zalaeta que queda en terceiro lugar, que o cruza co Xátiva Voleibol, terceiro clasificado do grupo 8, co que se xogarán os postos do 21 ao 24 a partir desta mañá de sábado ás 13:00.




mércores 27 abril 2016

COMEZA O CAMPIONATO DE ESPAÑA XUVENIL FEMININO



  Onte martes partía a expedición do CV Zalaeta con Autos Cancela, rumbo a Alcobendas, para chegar ás 22:00 á localidade madrileña onde se celebra o CEJF 2016 que hoxe mércores comezaba a competición.



  O equipo do Instituto con Pepe Díaz á fronte como delegado, está formado polas colocadoras Valentina Dorta, María Romero e Claudia Carreja; receptoras Ana Verao, Laura Vázquez, Raquel Rey, Paula Rey; opostas Ana Calvo e Paula Castro; centrais Nerea Tabeayo, Elisa Álvarez e Inés Rivas e líbero Paula Lema. Como primeira adestradora Tania Cobos que contará coa inestimable axuda de María Martínez e Noemí Vázquez.
  Esta mañá primeiro partido, toma de contacto coa competición enfrontándonos en primeira instancia co equipo organizador, Professional Answer Alcobendas, un dos conxuntos favoritos para facerse co título en xogo.
  Primeira derrota das coruñesas nun partido no que o rival non deu oportunidades, xogou mostrando o potencial das súas xogadoras, moitas delas formadas na competición de SF2, e impúxose por un 3-0 con parciais: 25-16; 25-22 e 25-10.
  A pesar de realizar un bo xogo no primeiro set, o Zalaeta caeu cunha diferenza importante para recuperarse no segundo e poñer en dúbida o xogo local, pero sen lograr pechar o set ao seu favor, o que influíu no resultado do terceiro no que as do Instituto xa non puideron manter a concentración e cederon a maior diferenza do partido.
  Simultaneamente, os outros equipos do grupo, Nou Gran Sol Manacor e CD Salesianos Guadalajara, resolvían o seu enfrontamento con un 3-0, con parciais 25-19; 25-14 e 25-17 favorable ás manacorís.

  Ás 18:00 comezaba a segunda xornada, cos enfrontamentos entre Alcobendas e Manacor e CV Zalaeta que se enfrontaba a CD Salesianos de Guadalajara.
Partido complicado, non cabían erros se se querían ter opcións na segunda fase de pasar á rolda dos mellores, había que facerse coa vitoria.
  Comezaba o partido con nervios, tratando de centrarse, o equipo de T. Cobos non atopaba o seu sitio na cancha, custáballes superar ás de Guadalaxara que tamén quería gañar o encontro e dominaban o marcador. O Zalaeta vai por detrás e vese obrigado a remontar un marcador adverso 19-23, consegue o empate e alóngase o set no que finalmente acaban impoñéndose 28-26.       Comezan a crer nas súas posibilidades  e o segundo set domínano vencendo claramente, pero a tensión e o cansazo, pasan factura no terceiro, as de Guadalaxara apertan e non se deixan dominar para poñer o 2-1 no luminoso e poder albiscar o empate que as levaría ao tie break.
 Con todo as coruñesas tíñano claro, non deixarían escapar a súa oportunidade e no cuarto impuxéronse claramente coa maior diferenza do partido logrando unha vitoria que as pon en xogo dentro do grupo A no que se xogarán o pase no partido de mañá ante as das Baleares.


CV ZALAETA 3  CD SALESIANOS GUADALAXARA  1  (28-26; 25-19; 20-25 e 25-8).
 
PROFESSIONAL ANSWER ALCOBENDAS  3  NOU GRAN SOL MANACOR  1   (25-23; 25-27; 25-17 e 25-19).


 Con estes resultados, o Alcobendas ponse con dúas vitorias e encabeza o Grupo A, seguido do Manacor,  en terceira posición o Zalaeta  e en cuarto lugar o Guadalaxara.
  Mañá ás 11:00 Alcobendas Guadalaxara no Luís Buñuel e Zalaeta Manacor no Valdemoro 1. Alcobendas practicamente clasificado, mentres que as coruñesas e as manacorís xóganse o pase nese partido, e quen o gañe ocupará a segunda praza.



luns 25 abril 2016

PREPARACIÓN PARA O CAMPIONATO DE ESPAÑA



  Continúa a preparación de cara o Campionato de España Xuvenil de Alcobendas, e este domingo tocou desprazamento a Lugo para xogar o último partido de preparación ante o outro equipo galego que participa no Campionato, o EMEVE.

  Non foi posible desprazar o equipo completo, pero todas as xogadoras participantes tiveron os seus minutos nun encontro que serviu a ambos os conxuntos para realizar probas e sobre todo para continuar con ritmo de competición e manter a tensión ante un torneo a piques de comezar.
  O Campionato de España comezará o vindeiro mércores 27, e o día 1 de Maio xogaranse as finais.
  A organización corre  a cargo do Club Voleibol Alcobendas e disputarano os mellores 24 equipos do voleibol español, clasificados nas súas respectivas competicións autonómicas. Divididos en 6 grupos de catro equipos, xogarán unha primeira fase nun todos contra todos a unha soa volta, da que os dous primeiros clasificados pasarán á fase que decidirá as posicións do 1 ao 12, e os terceiros e cuartos clasificados decidirán os postos do 13 ao 24.
  As eliminatorias xogaranse nos polideportivos Luís Buñuel e Amaya Valdemoro e as finais no Antela Parada da madrileña localidade de Alcobendas.
  O voleibol galego estará representado polos clubs EMEVE de Lugo e CV Zalaeta da Coruña. As lucenses atópanse encadradas no Grupo F con CV Elxe, CV LogroñoCV Leganés; e o CV Zalaeta disputará a primeira fase no Grupo A con CV Alcobendas, CV Manacor e CD Salesianos Guadalaxara.
  Na xornada inaugural, as do Instituto enfrontaranse ao equipo anfitrión, o Professional Answer Alcobendas ás 11:00 do mércores 27 no Luís Buñuel.


mércores 20 abril 2016

FINAL DO CAMPIONATO GALEGO XUVENIL 2016.



 Celebrábase o domingo a fase final do Campionato Galego  Xuvenil tanto masculino como feminino en Ourense, organizado polos clubs VoleyOurense e BurgasVolei, no que se proclamaron campións en categoría feminina, o EMEVE de Lugo, e en masculina o Dumbría Voleibol.
Claudia Carreja, Paula Castro, Ana Verao, Elisa Álvarez, Inés Rivas, Paula Lema, Noemí Vázquez, Tania Cobos, María Martínez, María Romero, Valentina Dorta, Laura Vázquez, Raquel Rey, Nerea Tabeayo, Paula Rey e Ana Calvo.
   Nunha intensa xornada deportiva na que pola mañá se disputaron as semifinais e pola tarde as finais, viviuse unha autentica festa do volei para goce de todos o público que se deu cita no Paco Paz da cidade das Burgas.
  O CV Zalaeta enfrontábase en primeiro lugar ao VoleyOurense nun partido de prognóstico incerto que comezaba ás 10:00, e que ofrecía ao vencedor o paso á final e unha das dúas prazas para o Campionato de España que ningún dos dous contendentes querían deixar escapar. E o prognóstico funcionou, houbo que esperar ao quinto set para coñecer o equipo gañador, nun partido complicado no que ningún dos dous equipos renunciaba á vitoria. Moi axustados e moi disputados os sets, alternancia no marcador para chegar ao tie break que se resolveu cun 13-15 finalmente favorable ás coruñesas.

 Os nervios fixeron acto de presenza no partido, ambos os contendentes xogábanse o final de tempada. Comeza o Ourense por encima no marcador, pero pronto remontan as visitantes que se fan co primeiro set, o segundo, mais disputado ceden as coruñesas nun axustado marcador para remontar de novo no terceiro  e perder o cuarto no que as locais forzan o tie break.
  Este túa miña que parecía o partido tivo continuidade no set do desempate, cun comezo irresistible o Zalaeta, 1-5, parecía que se impoñería con facilidade, pero cun marcador de 4-11, pareceu atascarse e deixou que o Ourense se atrevése a disputarlle o marcador que finalmente foi para as do instituto.
  A tensión era patente, nervios en ambos os dous contendentes, erros e faltas, pero a  pesar diso, cada equipo foi fiel a si mesmo, a boa defensa do VoleyOurense non foi suficiente nesta ocasión para frear o ataque do Zalaeta, que coa vitoria levou a praza en xogo para o Campionato de España Xuvenil de Alcobendas 2016.

 
 VoleyOurense - CV Zalaeta  1- 3  (19-25; 26-24; 17-25; 25-22 e 13-15).



  Mentres tanto, xogábase a outra semifinal entre o Xuvenil Teis e o EMEVE, que se saldaba con vitoria das lucenses por 3-0, con parciais 25-19; 26-24 e 29-27. Partido moi igualado como se pode apreciar no marcador, a pesar do resultado, no que as de José Valle levaron un triunfo que non resultou nada fácil.


  Pola tarde xogábanse as finais nas que se enfrontaban, polo terceiro e cuarto posto, Xuvenil Teis e VoleyOurense no que se impoñían as de Teis por 3-0 con parciais: 25-20; 25-19 e 25-20.
  A continuación xogábase a final entre EMEVE e o CV Zalaeta no que se impoñían as lucenses cun resultado claro de 3-0 con parciais 25-16; 25-23 e 25-16.
  O equipo de Tania Cobos acusou os cinco sets da mañá e non foi capaz de recuperarse para esta final, custoulle entrar no partido e cando o fixo, xa tiña un set en contra. O segundo foi máis igualado, as coruñesas tentárono, xogaron ben, pero un EMEVE ben situado non lle permitiu o empate. O terceiro un calco do primeiro, o Zalaeta veuse abaixo, cometeu moitos erros e ata contaxiou da súa apatía ao equipo de José Valle, que fixo o xusto para non deixar ir o set e o partido e proclamarse unha vez máis brillante Campión Galego, coa xogadora da canteira lucense Lucía Prol, destacada como Mellor Xogadora do Campionato.


               EMEVE - CV Zalaeta   3-0   (25-16; 25-23 e 25-16)

  Parabéns ás campioas!!




sábado 16 abril 2016

CAMPIONATO GALEGO XUVENIL 2016





  Mañá domingo 17 celebrarase o Campionato Galego Xuvenil no Paco Paz de Ourense, masculino e feminino, en xornada de mañá e tarde. No seu apartado masculino estará organizado polo Burgas Volei mentres que o feminino correrá a cargo do Club Voley Ourense.
  Despois da competición regular os seis primeiros equipos clasificados pasaron á segunda fase divididos en dous grupos de tres dos que os dous primeiros  de cada grupo acceden ao play off que decidirá o Campión Galego e dará paso ao Campionato de España de clubs.
  O Autos Cancela Zalaeta, cuarto na liga con 11 vitorias e 7 derrotas, realizou unha competición irregular, propia dun equipo en construción no que o cambio xeracional fíxose notar e tivo necesidade de adaptar e adaptarse ás novas incorporacións ao persoal. Para iso necesitou practicamente o transcurso da liga regular co obxectivo de meterse na segunda fase que daba opción a xogar por título.
  As 11 vitorias facíanlle acredor da cuarta praza, e a evolución do grupo de xogadoras a cargo da adestradora Tania Cobos poñía de manifesto as intencións de alcanzar o nivel máis alto posible para disputar o triunfo en todos os partidos. Así, a segunda fase realizada polo equipo do Instituto coincidiu co mellor xogo despregado ao longo da tempada, nunha progresión positiva cuxo punto máis alto correspóndese co final da competición, de modo que se mediu co EMEVE, campión da liga regular, repartindo os puntos e logrando un empate no que soamente lles separa un set o que supón a segunda praza do grupo que lle leva a enfrontarse na primeira semifinal co organizador VoleyOurense.

"Para nós a clave, di Tania, está en manter o noso nivel de xogo, a un ritmo alto de ataque, sen baixons nin perder a concentración ante un equipo eminentemente defensivo e que conta cunha boa distribución de xogo. O nivel de xogo do Zalaeta foi de menos a máis ao longo da tempada, e na fase final logramos momentos brillantes de xogo e tamén callado bos partidos, non perder os nervios será fundamental".
 
  O favorito, probablemente EMEVE de Lugo, campión da fase regular e reforzado coas xogadoras da Concentración Permanente Paula Martínez e Alejandra Olalla, sen esquecernos de Lucía Prol, xoven promesa da canteira lucense, pero nunha fase final como esta calquera cousa pode suceder, e as lucenses mídense na semifinal ao Xuvenil Teis, que coas xóvenes xogadoras Sara Urrea e Alicia González, habituais nas convocatorias de SF2 do seu equipo, e a inspiración da colocadora Larrán pode converterse nun rival moi serio.


   En canto á outra semifinal, mídense dous bloques antagónicos, un, o VoleyOurense, eminentemente defensivo, que o soporta todo e non dá nada por perdido que ten na súa colocadora Patricia a xogadora que pode ser clave no xogo do seu equipo, e que se medirá a un Autos Cancela Zalaeta no seu mellor momento da tempada, que se baseará no seu xogo de ataque e na súa consistencia na rede, que contará coa xogadora Paula Castro habitual de SF2 e a receptora Laura Vázquez cadete compoñente da Selección Galega bronce no CESA 2016.
  Nada está escrito, todo é posible, a solución mañá a partir das 10:00 no Paco Paz.